SINULOG - Ang Prosisyon

Gidagsa sa mga katawhan ang paggawas sa Senyor Santo Niño sa Basilica Minore del Sto. Niño. Nagbaha ang mga deboto nga nikuyog sa iyang prosisyon. Daghan kaayo ang taw pero mubo ra man ang gitaakan sa Balaang Bata. Tungod sa kadaghan, nisugwak sa gawas sa simbahan ang mga katawhan.

Gibaliwala sa mga taw ang pagtaligsik. Dili mapakgang ang ilang debosyon sa patak sa taligsik. Pero mura ra man sad ug blessings kay wala man gyud nikusog, wala gyud kauwan hangtud paghuman.

PIT SENYOR!!!

SINULOG - Ang Fluvial Parade

Niagi ang Milagrosong Bata sa Mactan Channel gikan sa Dakbayan sa Mandaue. Gikuyugan kini sa mga sakayan pang dagat hangtud sa Dakbayan sa Sugbo. Pag-abot sa Basilica Minore del Sto. Niño, gihimo ang usa ka re-enactment sa unang pagbunyag nga nahitabo niadtong 1521.

Nagpahigayon usab ug halag nga sayaw sa sinulog isip pagbalaan sa Senyor Santo Niño.

PIT SENYOR!

SINULOG - Ang Pagbisita

Ang Balaang Bata nga si Sñr. Sto. Niño uban sa iyahang inahan, si Birhen Maria, nibiya sa Dakbayan sa Sugbo aron pagbisita sa iyang amahan nga si San Jose sa Dakbayan sa Mandaue, ang silingan nga siyudad.

Usa kini ka panagtipon sa Balaang Pamilya diin moistar sila ug usa ka gabii sa simbahan sa Dakbayan sa Mandaue.

Ang mga deboto sa Patron sa Sugbo nagbaha, dili lang ang taga-Sugbo kung dili mga katawhan nga nagagikan sa nagkalain-lain suok sa Nasud ug ang mga langyaw nga nituyo ug duaw aron sa pagsaulog sa kapistahan sa Batang Milagroso.

PIT SENYOR!

Ang Mga Pulong..

Sa akong pagkabaton ug kabuot, wala nako damha kung unsa ka daghan ang mga pulong nga Bisaya. Kung unsa kalapad ang iyang naabtan. Abi man nako ug sa Cebu ra pero halos iyang gikuptan ang Visayas ug Mindanao.

Pero nakapangutana ako, unsa ang gibasihan sa Bisaya. Unsa nga mga lumad nga pulong ug kinsa ang mga taw nga nasakop sa Bisaya? Tungod sa kadaghan sa nigamit niini, dili matugkad kung unsaon pagsubay. Ang iyang pagkatap sa ubang lugar nakahatag ug gibug-aton kung unsa kini kanindot samtang siya nilambo.

Sa mga taw nga nigamit niining pinulongan, BARUG - IPASIGARBO ang pagka-BISAYA...